唔記得邊個朋友同我講過，男人要開心好簡單：有飯食、有愛做、有覺瞓，夠哂！我唔知各位男士又點睇呢句嘢，但根據「Tracking Happiness」網站做嘅一個研究，就的確發現男人比起女人，係更容易認為「有性就有快樂」。

Tracking Happiness早前訪問咗1,147名年齡介乎15-60歲嘅男女，並要求佢哋於「愛」、「笑」、「健康」、「財富」、「安全感」等15個單詞中，選出五個佢哋認為與「快樂 (Happiness)」最相關嘅單字。結果頭五名分別係「愛」、「家庭」、「喜悅」、「健康」及「滿足感」係最重要，「性」只係排14，只有15%嘅受訪者揀咗呢個單詞，相對黎講算係好唔重要。

但有趣嘅係，如果你將揀咗「性」嘅人分返開男女，就會發現有20%男性認為「性」同快樂有重要關係，而女性嘅數字只有8%，換言之，男性嘅比例係女性嘅2.5倍。似乎就坐實咗「男人有性就開心」嘅印象。

圖片：Tracking Happiness

但Tracking Happiness亦有指出，雖然過往有好多研究都話「性」係會令人心理上及生理上都令人感到快樂，但唔代表男人有性就一定會開心，又或者越多性行為就越開心。是次研究只係能夠證明相比起女性，「性」對男人嘅「快樂」更為重要 ——又或者換個角度講，就係好少女人覺得「性」會係快樂嘅重要來源。