據《The Verge》報導，Google CEO Sundar Pichai於美國時間星期日向員工發出電郵，指未來Google將會全面推行「混合工作模式」，即容許員工每日只需返Office辦工幾日，其餘時間就可以Work From Home。

疫情發生後，Google係最早一批宣佈員工可以WFH嘅美國科技巨企，早於三月就已經叫員工唔好返Office，今年7月時更宣佈WFH會推行到下年7月。而Sundar Pichai於最新嘅電郵中通知員工，全面WFH會再度延長到下年九月。而且即使9月時情況容許員工返Office，Google都會全面推行「混合工作模式」，亦即係每個員工每星期都只需要返Office三日，其餘日子就繼續WFH。如果效果良好，就會成為往後嘅主要工作模式。「暫時未有一間好似我哋咁大嘅公司實施全面混合工作——雖然都有其他人開始試緊——所以試下都幾有趣」。

但如果與Facebook早前宣佈嘅全面WFH、又或者Microsoft推行嘅「混合工作室」相比，Google就要求員工必需住喺辦公室嘅「可通勤範圍」，換言之員工唔能夠搬去其他城市甚至國家居住，當然佢亦唔會請來自其他城市或國家嘅員工，相對黎講就冇咁大自由度。同時由於部份員工必須使用Office先有嘅特殊器材，所以無論係WFH定混合工作模式都係冇佢哋份。