有間以前好成功嘅銀行曾經出過個廣告，話喺香港養一個小朋友要400萬——仲已經係十幾年前嘅數字添——搞到好多人到依家都唔敢生仔。咁你話係香港養小朋友特別貴呀？定係佢條數吹大咗呢？有日本組織就計咗條數，話畀大家知一個喺東京生活、養兩個小朋友嘅家庭最少要使幾多錢！

條數係咁計嘅：一對於三十代 (30-39歲)結婚再即刻生咗兩個小朋友嘅夫婦、老公返正職女方做兼職或者家庭主婦，要喺日本東京以「普通生活」嘅水準養到兩個小朋友讀完大學，而「普通生活」就即係「於練馬區租一間43平方米 (約462平方尺)嘅屋」、「每人每餐300Yen (約HK22) 以內再加每個月3,500Yen (約HK$262) 飲一次嘢」、「成家人一個月出去玩一次8,000Yen (約HK600)」，再加上「小朋友教育費每個月28,000Yen (約HK2,100)」，然後再加埋稅、社會保險之類，就得出每個月要使54萬Yen (約HK$40,500)、一年650萬Yen (約HK$48.7萬)。

圖片：Huffingtonpost.jp

但要留意嘅係一年650萬Yen呢個數唔係永恆不變，當對夫婦步入40代 (40-49歲)時，每年開支就會增加到740萬Yen (約HK$55萬)、到50代 (50-59歲)更加會增到960萬Yen (約HK$72萬)。而當中最主要嘅增幅唔係來自通漲或者睇醫生，而係小朋友嘅教育費。例如小朋友讀私立大學嘅話，每個月學費可以高達13萬Yen (約HK$9,750)，仲未計啲入學考試費、書簿費之類雜項。

如果按呢條數，喺東京以「普通生活」標準養兩個小朋友廿年就要大概1.5億Yen，即係1150萬港紙左右，平均月入要有HK$4.8萬先夠畀。我唔知大家份糧有幾多，但我嗰份就大概可以養得起大半個小朋友啦…