近日英國學術界成為大眾關注對象，而原因就係來自曼徹斯特大學嘅博士生Karl Andersson於4月時發報咗一篇論文，紀錄自己用「正太 (即小男生)」色情同人誌自慰三個月嘅紀錄與感想，而且得出一個頗有哲學性嘅結論。結果就令傳媒、政客以至一眾道德團體質疑論文，以至英國學術界嘅道德標準。

Karl Andersson

圖片：research.manchester.ac.uk

卻說Karl Andersson本身就研究緊日本漫畫嘅次文化，某次佢發現一位研究對象會用正太色情同人誌黎自慰，剛巧當時佢獨居而且單身，所以就希望透過模仿研究對象嘅行為，進一步了解佢哋嘅經歷與心情。於是佢就以三個月為期，期間只能以正太色情同人誌為自慰素材，唔可以與其他人做愛、唔可以睇其他成人內容、唔可以有其他幻想，再於每次自慰後紀錄佢所用嘅正太素材，自慰嘅地方、時間、長度，以及完事後嘅感想。

而佢得出嘅結論，係「為自慰、特別係用漫畫這種2D素材自慰，附上更大嘅意義及價值」。佢話透過反思及紀錄自己嘅自慰行為，佢開始質疑「是否每一種性愛，不論對象是否真人，其實都係一種自慰。我們都是集中於個人快感，而對方其實只係『自慰工具或素材』」，繼而產生「我們都是孤獨的」呢個念頭。

但同時佢亦指出「我們不是孤獨的」。雖然自慰時佢的確係一個人，但「正太素材」嘅背後其實有作者以及其他同好；同時因為「其實自慰時你個腦唔可能係完全空白」，所以佢會諗起以前認識嘅人，又或於街上見過嘅人，甚至係前度。佢認為 (色情) 同人誌文化嘅出現，可能就係「於一個被孤獨大規模佔據嘅社會中，對於不再孤獨嘅渴望。」

但如果你都覺得呢個研究怪怪地，咁就應該可以想像到衛道人士見到個研究後嘅反應。例如來自牛津大學嘅歷史學家Dr Mara Keire就質疑，「點解一篇描述作者用小男孩圖片自慰嘅論文，會過到同行評審 (Peer Review)又出到街？」英國保守黨議員Neil O'Brien就質問，「點解我選區中勤奮工作嘅納税人，要畀錢一個學者去寫低佢用日本成人內容 (Porn) 自慰嘅經歷？」

資料來源：The Guardian、I am not alone – we are all alone: Using masturbation as an ethnographic method in research on shota subculture in Japan