每年暑假都係動漫發力之時，而今年暑假除咗有爆紅動漫《SPY x FAMILY間諜家家酒》播出第一季Part 2，仲有《龍珠》推出最新劇場版《龍珠超劇場版：超級英雄》、以及《One Piece》最新劇場版《One Piece Film RED》，想必會引起話題。而著名動漫週邊廠商TAMASHII NATION就會與旺角朗豪坊合作，舉辦「TAMASHII FIGURE FES夏日電影館」，以滿足Fans。

睇個名就知今次展覽以「電影」為主題，場景亦以戲院為靈感。最搶眼嘅當然就係《SPY x FAMILY間諜家家酒》一家三口嘅1:1立板首次現身，而且場景參照首映禮，等大家可以於打卡牆前與佢哋合照。另一邊就擺放咗以戲院小賣部為主題嘅《Naruto》區，可以見到用100隻Figure重現鳴人使出多重影分身嘅場景，當然亦唔少得1.7米高嘅鳴人本尊。

而《One Piece》方面就派出全高2米、噸位十足嘅嘅前四皇「Big Mom」，亦係另一個打卡熱點。現場更會展出多款還未公開發售的Figure，包括Figuarts ZERO [超激戰] 莫奇·D·路飛 4檔 -三船長 鬼島怪物決戰-、Figuarts ZERO [超激戰] 沙羅特·林林 -花魁玲子 鬼島怪物決戰-等。

另外場內亦擺放咗《龍珠超劇場版：超級英雄》、《One Piece Film RED》以及《咒術迴戰0》嘅電影海報，悟空本人亦會現身於場內；而最近開始連載新作嘅《魔法小神童加旋》亦與《咒術迴戰》一齊佔據場內一角，展出最新Figure。

TAMASHII FIGURE FES夏日電影館

8月11-9月12日

旺角朗豪坊4樓