相信唔少人都曾經有用交友APP嘅經驗，甚至唔少人都曾經期望於交友APP上搵到真愛，但實際用落就會發現，要喺交友APP上搵到與自己匹配嘅對象，其實係一件非常困難嘅事，更多時候一係就配對唔到，一係就配對嘅人唔啱心水，點解會咁呢？日本《週刊SPA》早前就搵黎兩性專家分析交友APP上嘅男女生態，原來一切都係一個局黎！

圖片：《週刊SPA》

《週刊SPA》早前就「日本20代男性有4成人從未約會過」而製作咗個專題報導，其中一部份就搵黎日本戀愛顧問「鈴木リュウ」分析交友APP上嘅生態。而鈴木リュウ就用一張圖黎解釋。

首先，圖中左右分別為S級至D級嘅男女 (以交友APP上嘅獲讚數區分)。其中S級男及S級女由於自身條件已經夠好，根本就唔需要用交友APP，所以A級男女就已經係交友APP上最高質嘅一群，而考慮到交友APP上男性遠多於女性，所以A級女生好快就可以搵到心儀對象，然後退出交友APP；淨返嘅A、B、C級男性，就會於交友APP上與B、C級女性配對。

問題就出在呢個「A、B、C男配B、C女」嘅情況。由於B、C級女性於交友APP上會見到A級男嘅檔案，所以佢哋就會以搵到一個A級男為目標，問題係A級男雖然有大量讚好，但對方通常都係佢認為「比唔上自己嘅人」，所以最後無法配對；另一邊廂，B、C級女又因為A級男嘅存在，而對於「配得上自己嘅男生」產生誤判，於是睇唔上同級嘅B、C級男，令B、C級男於交友APP上讚好、配對數奇低，成為使用滿足度最低嘅一群人。結果造成「A級男睇唔上B、C級女；B、C級女又睇唔上B、C級男」嘅困境。而B、C級男就會因為希望得到更多配對而課金，成為營運商嘅主要收入來源。

有趣嘅係，由於D級男與D級女同樣都不太受歡迎，反而會非常珍惜每一次配對，所以「於交友APP上認識再結婚」嘅機率反而係最高。

資料來源：《週刊SPA》