所謂「認知能力」中包括思考、邏輯、記憶、注意力等多個方面，而除咗年紀、健康、教育程度等因素外，一個人嘅社交生活狀態其實亦會影響認知能力嘅高低，例如過往曾有研究發現認知能力與婚姻滿意度息息相關。而近日一個南韓研究就發現，中老年人嘅婚姻滿意度與其認知能力大致呈現正相關，即係婚姻滿意度高，認知能力就高；但同一時間，研究發現如果婚姻滿意度低，對認知能力嘅打擊程度更大。

來自南韓嘅兩位研究員「Jinho Kim」及「Sungsik Hwang」表示，於較為傳統嘅南韓社會中，一個人嘅婚姻狀態影響緊佢嘅社交地位、身份認同及社會角色，從而影響個體人士嘅認知能力。而為咗了解婚姻同認知能力之間嘅關係，佢哋從一個每兩年訪問約7,400名年齡為45歲或以上中老年人一次嘅國民調查中，提取出當中已婚、無認知障礙人士嘅認知能力及婚姻滿意度數據，並透過對比得出前後兩年嘅婚姻滿意度及認知能力變化，以了解兩者之間嘅關係。

結果就發現，婚姻滿足度逐漸提升嘅人，其認知能力亦會一直改善；但婚姻滿足度漸漸降低嘅人，其認知能力就會以一個更大嘅幅度下跌，而且幾乎只出現於老年人身上。換言之，從認知能力嘅角度去睇，婚姻對老年人其實係一場賭博，賭得啱（婚姻滿足度高），回報就係認知能力稍為改善；但賭錯（婚姻滿足度低），認知能力就大幅下跌。

從中我哋可以得出兩個結論。首先直頭唔結婚，理論上係就唔會參與呢個賭局，老年時嘅認知能力就唔會受婚姻滿足度影響，但成為「孤獨老人」對認知能力嘅影響還需其他研究得知，所以未必係個最好嘅方法。另一個結論，就係改善老年人嘅婚姻滿足度，就可以改善佢哋嘅認知能力，或者至少減輕對認知能力的負面影響。

資料來源：The asymmetric effects of improving and declining marital satisfaction on cognitive function