金錢對於生活係非常重要，甚至唔少人會認為金錢、名牌、炫耀係生活中最重要嘅嘅部份，而呢啲人往往就被稱為「物質主義者」。近日一個中國研究，就發現自覺外表吸引嘅男女，係更傾向成為一個物質主義者，而背後嘅原因好可能因為佢哋鍾意同人比較。

來自中國甘肅蘭州西北師範大學心理學系嘅「Xiaoyue Zhao」及「Baoyan Yang」近日於學術期刊上發表關於「自覺外貌吸引度」與「物質主義」之間關係嘅研究。研究分成兩部份，首先佢哋搵咗260名來自中國山東、平均年齡為20歲嘅大學生，並要求佢哋回答一系列有關自覺吸引度、物質主義傾向及社會比較性（即係有幾鍾意同社會其他人比較自己嘅能力、地位等）等嘅問卷。結果發現，自覺吸引度嘅人，同時會有較強嘅物質主義及社會比較性傾向。進一步分析數據後發現三者之間嘅關係：覺得自己靚仔/女，就會更想同其他人比較並勝出，於是就會變得更係物質主義。

但更有趣嘅係，研究同時發現提升自我形象能有效中和物質主義傾向。研究嘅第二部份搵黎另外820中國大學生，並從中選出約220名自覺最靚仔/女嘅人，並將佢哋分成兩組，一組進行提升自己形象嘅任務——寫低三個自認為最重要嘅人生價值並提供理由；另一組就相反地進行降低自己形象——寫出三個最唔重要嘅人生價值。結果發現前者做完任務之後，物質主義傾向有所下降，後者則反之有所提升。

簡而言之，就即係自覺靚仔/女嘅人會更傾向同其他人比較，所以一般而言都會傾向物質主義。但假若佢哋嘅自我形象有所提升，就能解抵銷部份影響。

資料來源：Beauty and riches: People who think they are attractive are more materialistic, the mediating role of social comparison orientation and the buffering role of self-affirmation