近年唔少集換式卡牌嘅價值直線上升，甚至有人將卡牌視為一種投資、投機，成功一夜暴富。不過亦有人赫然發現當年嘅收藏原來價值千金，但當年嘅收藏早已不再存在。近日日本就一個關於《魔法風雲會》（Magic: The Gathering，簡稱MTG）嘅類似故事發生。

話說日本有個叫《稀世珍寶開運鑑定團》（開運！なんでも鑑定団）嘅節目，主要就係為民間收藏家鑑定其收藏嘅價值。而早前佢哋播出嘅一集，就有位62歲嘅「藤原先生」拎出1993年10月推出嘅MTG Beta版整套302張卡牌收藏出黎鑑定，最終節目組為整組卡牌開出3,800萬Yen，即約HK$200萬嘅超高價。當中單單係包含著名卡牌「黑蓮花」（單張800萬Yen）嘅「Power 9」九張牌就已經值2010萬Yen（約HK$110萬）！難怪「藤原先生」知道開價之後於節目中振臂高呼。

而節目播出之後，有一位叫「そうよう」（@Souyou_com）嘅日本網友就於X上分享，指出自己當年都有收藏MTG卡牌，而且節目中嘅「Power 9」佢都有儲齊。可惜嘅後來卡牌被媽媽無心之下「丟」咗，如果以節目中嘅估價，即係唔見咗最少百幾萬港紙，幾乎可以買樓。

「そうよう」後來有解釋，卡牌其實唔係被媽媽當垃圾掉咗，而係有次媽媽搵廢物回收人員黎估計時，對方嘅人拎咗。更過份嘅係對方無拎到屋內任何其他物件，證明佢哋深知卡牌嘅價值。而往後「そうよう」一家亦無收到廢物回收公司嘅任何估價，完完全全血本無歸。

「そうよう」亦強調事件唔係媽媽嘅錯，比起怪責媽媽，佢更擔心係《開運》節目忠實Fans嘅媽媽睇完節目之後，知道個仔因為自己而唔見咗間屋而感到內疚。

資料來源：