響度講清楚一件事先，跟據傳統、習俗，2月14情人節係女仔向心儀對象表白嘅日子，所以啲女仔先送朱古力，咁男方有意回應的話，就會響白色情人節，即3月14號送禮回應，個重點係雙方透過行動表達心意。由唔知幾時開始，香港嘅男士們無視咗呢個傳統，連2月14都係男仔約出街食飯、送花送禮，結果白色情人節就無哂存在意義。

講返錶先，Hublot 有對幾乎全白嘅情侶錶，男嗰隻叫Big Bang Unico White Ceramic、女嗰隻叫Big Bang Aspen White Ceramic，睇名就知兩隻錶皆由陶瓷，戴起手非常搶眼。

Big Bang Unico White Ceramic

配備自家研發同生產嘅1242 Unico機芯，搭載自動飛返計時功能同雙離合裝置，錶殼直徑45毫米，由緞面拋光白色陶瓷製成。錶鏡、背都係藍寶石水晶鏡 + 內外層防反光處理，黑色個幾個部件係黑色合成樹脂，錶帶亦係黑白橡膠。

Big Bang Aspen White Ceramic

女仔嗰隻大同小異，HUB4300自動機械計時機芯﹐錶殼直徑41毫米，錶耳等部件用白色合成樹脂，錶冠、按鈕部份係精鋼加上白色橡膠嵌件，指針經拋光處理鍍銠，閃得頗靚嘅。

呢兩隻白色情侶錶唔算太成熟，橡膠、樹脂製成嘅部件保持年輕玩味，一對嘅售價約莫廿萬鬆啲。