之前已經約略咁同大家介紹過海港城嘅櫻花文化祭，有藝術展覽，有和樂器表演，更加重要，係有好多靚 Sake 俾大家試飲。Sake 同葡萄酒一樣，你一開咗，就要響短時間之內飲哂，否則好快會變味，而呢啲試飲會，一次有幾十款俾你揀嚟飲，其實非常之適合飲家捧場。

講返先，呢個期間限定居酒屋位於海港城港威商場大堂I，供應近百款清酒，其中更加有 8 款係首次於香港登場，大家可以先飲為快。去居酒屋試酒嘅途徑有兩個，一、活動期間於海港城任何餐廳以電子消費每滿HK$100，可換領清酒品酒券1張(每張單據最多可換5張，數量有限，換完即止)；二、捐款HK$120予「東日本大震災兒童未來基金」，可換領清酒品酒卡1張，品嚐10款清酒。第 2 項既可以做善事，又可以試到酒，講堅一舉兩得。

有留意Menclub嘅朋友，應該都見過我率先為大家試飲咗不下20隻清酒 (唔係為自己架)，呢度推介幾枝香港首推俾大家參考吓 :

來自石川縣久世酒造嘅長生舞，呢度有大吟釀同特別純米酒俾大家試。作為少數由種米到釀酒都係自家開發嘅酒造，做到嚴格嘅品質監控，前者用咗100%山田錦，酒米之王，40%精米步合，1.3 酸度，經長期低溫發酵，出乎意料嘅細膩變化，柔順至極嘅口感，平衡得宜嘅甜度，一定要試試佢。

另外有兩款風之森微炭酸汽泡酒 (其係好微架咋，志在製造清爽口感)。第一隻綠色樽「秋津穂純米」，有檸檬清香，菠蘿嘅酸甜果味，超硬水質營造礦物感，圓潤得嚟好甘甜。黑色樽嗰隻更加銳利，有楊桃、蜜瓜Soda嘅風味。

有隻啫喱梅酒大家都係要試。要知道日本梅酒一向都甜到爆炸，香港人通常都要加水先飲，不過呢度池龜酒造嘅啫喱梅酒就唔同啦，完全人手製作，唔算好甜又有豐富嘅梅子香味，釀酒時用咗米燒酒同九州完熟大梅子，配合天然素材整成啫喱口感，好特別!

經驗豐富嘅飲家應該比較鐘意呢兩枝。左手邊常歡呼純米大吟釀，有成熟蜜瓜濃厚嘅果香，亦有大吟釀級數嘅細緻變化，係水準高超嘅作品。右水邊嗰枝，秋田市太平山純米大吟釀，獲得2014年全國新酒鑑評會金賞，小玉釀造用最優質、罕有嘅「大平山」米將傳統風味呈現於飲家面前。

Photo: Sam@MenClub