鐘錶以高準碓性、精密嘅機械結構為美學標準，而呢個行業入面，又有3項最廣受認同嘅頂尖工藝 : 三問錶、萬年曆、陀飛輪。今次我地先講大家比較耳熟能詳嘅「陀飛輪」。

機械構結構原理

機械錶嘅結構，主要係由發條盒、時間齒輪同擒縱系統所組成。當你喺錶冠上鍊，為隻錶提供動力來源 (自動上鍊係用擺陀嘅)，啲Energy就會被儲存於發條盒，同時由發條盒釋放動力，推動時間齒輪，令錶盤指針運轉。係咪有啲難明呢? 機械結構，睇片就最清楚 :

OK，有動力來源，啲指針識轉，咁點樣調整啲指針用合適嘅速度轉動呢? 呢個時候我地就需要所謂嘅擒縱系統。顧名思義，呢個系統嘅運作係以一收一放嘅形式郁動，佢會以特定嘅頻率，或者用節奏去形容會易明啲，一開一合，控制動力輸出。擒縱系統於15世紀已經有，去到今時今日，已經發展成種類繁多，又極為複雜嘅樣式，遲吓再同大家講。

Abraham Louis Breguet

入正題，我地講緊嘅「陀飛輪」，就係1795年由鐘錶大師 Abraham Louis Breguet (寶璣) 發明嘅機芯裝置，佢將游絲、叉式槓桿和擒縱系統，全部放哂喺同一條軸度郁，去減少地心吸力嘅影響，令鐘錶運行更加準確。

陀飛輪模組 (Tourbillon Module) 將游絲、平衡擺輪、擒縱系統等嘅部件，全部用同軸運行，放置於一個框架 (Cage) 之中，好似個圓形嘅漩渦咁 (Tourbillon 法文原意)。於呢個架構之中，擒縱系統可以圍繞軸心作360旋轉，地心吸力所引起嘅快慢誤差，都會平均分散於整個系統入面，一般陀飛輪都係一分鐘轉一圈。所以我認為，與其話陀飛輪係擺脫地深吸力，不如話佢融化咗地深吸力會更具體。

可以睇Blancapin 點講

後來市場上出現更加多嘅改良版陀飛輪，1927年德國鐘錶大師Alfred Heiwig拆除咗固定板橋，而變成「飛行陀飛輪 Flying Tourbillon」，現代仲有偏心時間顯示陀飛輪、多重陀飛輪架構，立體球型陀飛輪等等，鐘意嘅朋友，不妨慢慢研究，或者PM我地逐個拎出嚟講都得。

Jaeger-LeCoultre Reverso Gyrotourbillon

大家可以睇到陀飛輪嘅結構非常複雜，亦只有頂級鐘錶工匠製造陀飛輪腕錶。複雜嘅組合入面，蘊含幾十至百幾個極為精細嘅部件，全部都極之輕、極之纖薄，無論係製造，定係組裝，都需要高超嘅技術。陀飛輪連埋成個設計，運行上嚟就好似一件美學結晶咁，所以大家都用藝術品嘅價格去定位陀飛輪腕錶。