Nomos嘅性價比一向都非常高，啲款式設計又簡約大方，非常易襯，就好似佢地之前隻 Metro 38 Datum入門機械錶，HK$22,000 有自家擒縱系統玩，錶盤設計又夠靚仔實用，好快就供不應求賣斷市。

不過最近俾我證實到佢終於返貨啦，各位識貨嘅錶迷可以留意吓。呢隻Metro加大咗1.5mm錶殼尺寸，減去咗動力儲存顯示，大方、乾淨、均稱，白色鍍銀錶盤 38.5mm，有精緻嘅分鐘刻度同大日曆視窗，3點、9點、12點藍色時標襯返紅色秒針，成熟而且 fashionable。

難得嘅係 Metro 38 Datum 竟然有自家研發嘅機械機芯 DUW 4101 加同樣係自家嘅擒縱系統，有停秒功能、格拉蘇蒂四分之三夾板、回火藍鋼螺絲，鍍銠機芯表面，飾有格拉蘇蒂條紋同魚鱗紋，大鋼輪、上發條齒輪飾有格拉蘇蒂日輝紋，動力儲存約 42 個鐘，其實都相當之精緻。

錶殼係兩件式不銹鋼，配搭弧面藍寶石水晶錶鏡加藍寶石水晶底蓋，而錶帶則會配襯霍爾文高級科爾多瓦黑色馬皮，登場至今已贏得German Design Award、Good Design Award同iF Product Design Award等大獎，名副其實，係買得過嘅年度好錶。