Laphroaig，一個Islay迷或者泥煤迷必需認識嘅名字，蘇格蘭艾拉島8大蒸餾廠之一，出哂名風味濃厚，帶有重泥煤味，即係啲人成日講嘅「正露丸」味。成立於1815年，去到今日整整200年歷史，一直支持佢地嘅，仲有威爾斯親王查理斯王子，1994年佢親臨Laphroaig，仲送咗個 Royal Warrant 勳章俾蒸餾廠，而家你去Laphroaig仲會見到，非常架勢。

Laphroaig新品Lore，號稱蘇格蘭威士忌之中，風味最豐富嘅作品，除咗經典嘅泥煤味之外，佢地更加強調一種豐盈、具深度層次，非常獨特嘅煙燻味，伴隨滿有礦物味嘅海洋氣息，帶俾飲家非一般嘅嶄新感受。再三強調，煙燻 (Smoky)同泥煤 (Peat) 係兩回事嚟嘅。

Lore 屬於經典 Laphroaig 與多年份 Laphroaig 嘅藝術結晶，如同 Quarter Cask一樣，釀酒師提煉出靈魂般嘅泥煤風味，但今次Lore則以歐洲組裝桶做雙桶熟成，增加順滑口感；要令威士忌更具層次同埋複雜性，Laphroaig採用咗以 ex-Laphroaig酒桶熟成，最具泥煤味嘅原液，再置以精挑嘅雪莉桶之中。要欣賞佢咁複雜嘅工藝同味道，48% ABV唔少得。

酒色呈現出深沉嘅褐色，香氣散發出豐盈、迷人嘅煙燻味道，海洋氣息嘅礦物味、仲有少少黑朱古力嘅點綴，如果你加一兩滴水，雲尼拿、奶油、柑橘果香會更為強烈。入口係Laphroaig標誌性嘅泥煤味道，香辛質感亦非常明顯，收結時有悠長而甜美嘅回甘。