職人，即係指於擅長某一領域、技術嘅從業者，而日本職人之精神，尤其值得尊敬。無數日本職人花數十年時間，甚至窮一生精力，每日重重複複，只為做好一件產品、磨練一種技術，將之達到化境，我地稱呢啲人做「大師」。極致嘅造詣絕對係可遇不可求嘅人間寶藏，MRG-G1000HT「鎚起」就將登峰造極嘅職人技藝，融入高科技嘅腕錶之中，世紀級天作之合，賣5萬大元係有原因的。

「鎚起」，一種金屬加工技術，將一片金屬片薄薄的鎚打成3D形狀。歷史上，呢項技術多用於製作銅製品同其他金屬器皿，以至輕薄堅固嘅武士盔甲、頭盔；而現代就被應用於製作鐵路列車、飛機等組件之上。腕錶錶圈、錶帶上面嘅凹凸坑紋，就係「鎚起」打造出嚟特別質感，注意，呢啲坑紋，係人手一吓一吓地打出嚟，精細無比，隻隻都獨一無二。

除咗強勁嘅抗衝擊結構、200米耐水性，「鎚起」每日能夠自動接收6次無線電波 (強國除外，少一次)，以全球定位系統混合電波時間，直接轉換、較正當地時間，無論你去到世界各地，腕錶都會為你提供最準確嘅 local time，錶盤同時顯示埋世界時，好適合上山下海嘅旅行用家。

全自動年曆、LED超級燈、省電模式下連續用到18個月嘅太陽能充電系統，仲有準確到無朋友嘅計時秒錶，功能性仍然強大，應付極限環境一樣無有怕。全球只有300隻 (無法啦，人手逐隻打出嚟喎)，據聞香港亦有幸分配到十幾隻，認真珍稀無比，即使你願意付出5萬大元，都未必能輕鬆入手。