今年Basel錶展，Rolex真係驚喜連連，陶瓷圈Panda色黑白地通拿，新版Air King，仲有呢幾隻新Yacht-Master，如果唔係預先搶咗水貨，我估大家都係等呢期正貨返香港架啦。之前講完地通拿同Air King，今次同各位解構一下新版40mm嘅Yacht-Master 40系列，暫已時知有3款，永恆玫瑰金鋼配朱古力色錶面 (Ref. 116621)，鉑金鋼配藍面 or 灰面藍針 (Ref. 116622)，其實3者睇落都好靚仔，而其中嘅Rose Gold款最有貴氣 (當然價錢亦都最貴啦)。

Rolex於Yacht-Master 40mm錶殼採用專利 Rolesor (金鋼) 技術，意思即係將金屬同精鋼融合，以Yacht-Master Rose Gold款為例，外圈、錶帶中間鏈節位係用咗18ct Everose (Rolex專利永恆玫瑰金)，而中層錶殼、錶冠、錶帶兩邊則使用904L精鋼鑄造，保證腕錶有Rose Gold嘅奢華，亦有精鋼嘅堅固性能。

經典蠔式錶殼，中層以整塊904L精鋼鑄造，專利三扣鎖、三重防水，令防水深度達100米，鏡面以合成藍寶石水晶製造，貫徹Rolex鋼水足、堅固耐用嘅特點。雙向旋轉外圈上面有60分鐘刻度，啞面磨砂底襯大型立體拋光數字、刻度，感覺非常凸出，鏡面3點位有個凸透鏡，方便你睇日期。

另外兩款都係使用鉑金鋼，即950鉑金配合904L精鋼材質，一款為藍面紅針，另一款為灰面藍針，隻Blue介乎於藍綠之間，係有青春玩味，但又有啲少女情懷喎。

3款Yacht-Master 40mm均搭載3135型自動上鏈機械機芯，配備Rolex專利藍色Parachrom游絲，特製合金有效減低磁場影響，提升腕錶嘅準備度同穩定性，其平均誤差為每日 +/- 兩秒之內，比天文台認證嘅標準仲要精密兩倍，取得COSC當然係毫無難度啦；機芯自動上鏈機關提供到約48小時嘅動力儲存。

如果覺得40mm太大 (呢個年代都好少架啦，市場普遍覺得大好過細)，仲有一款37mm嘅Yacht-Master (Ref. 268622)，同40mm鉑金鋼灰面藍針款一模一樣，分別只係細啲，同搭載咗2236型自動上鏈機芯。