時間除咗記錄事物發生嘅序列，亦係生命大限嘅倒數，用家每一次望錶，就每接近死亡一步。錶廠用骷髏頭設計提大家要珍惜當下，實在用心良苦呀…… (誤)。如果正面啲諗，提醒你死亡一事，都係想你珍惜現在，活得更好，睇過《Tuesday with Morrie》嘅朋友，一定明箇中道理。

2009年Bell & Ross 出第一隻骷髏系列 BR01 Skull，2015再出銅版 Skull Bronze，今年新作 Burning Skull，設計師終於搞清楚重點，以軍事標識融合甚具立體感嘅紋身雕刻，型仔且極有質感，唔似上兩代咁有啲玩水印貼紙嘅感覺。

所謂軍事標識，係講個骷髏頭嘅起源。話說美國第82、第101空降師於1944年6月6日黎明時分從天而降，改變整個諾曼第嘅戰局，而呢啲兵士嘅跳傘用具上，就有個骷髏頭飾紋，並附「Death from Above」，即天降死神嘅字樣。BR01 Burning Skull 用正方形精鋼錶殼加黑色錶盤，浮雕展現骷髏頭嘅死亡氣息，時針、分針分別為匕首同軍刀，軍事風更為濃厚。

腕錶具有雙層錶盤，令浮雕睇落更為深邃，錶廠憑藉錢幣鑄造嘅金屬加壓技術，令中央嘅骷髏圖非常精巧逼真。盤面嘅黑色夜光物料，使骷髏頭可以於低光、黑暗環境展現出令人心寒嘅光芒。骷髏頭係好靚，但我認為錶殼嘅凹雕紋身圖案，先係今次Burning Skull嘅真正主角。

錶殼正反兩面都有向四面八方飛濺嘅火花，細節、造工都係頂級。錶殼背面有個巨大標飾同刻文，彎曲嘅文字好似你真係紋上手臂嘅tattoo咁，細心啲睇，凹紋隱藏心臟、玫瑰、死神鐮刀、沙漏，4個象徵死亡同宿命嘅圖案。

為咗營造近似紋身嘅效果，錶廠喺處理精鋼上嘅每一條線上，都使用刻針同黑色墨水、清漆手工雕刻而成；整個過程之中，部件需要放入烤爐燒製多次以固定漆面，絕對係漫長而艱巨嘅工作。不過最後製成嘅黑色漆面，就會有光影交疊嘅美妙色澤，明暗對比亦較為強烈。

BR01 Burning Skull，46mm精鋼刻紋錶殼，面頭係藍寶石水晶玻璃鏡，黑色錶盤有Superluminova夜光塗層。腕錶搭載BR-CAL.30自動上鏈機芯，只有簡約嘅匕首同軍刀 (時、分針) 功能。襯埋啡色鱷魚皮、超耐磨黑色合成織物錶帶，限量500隻，價錢HK$59,300。