不得不承認，Glashutte Original (GO) 推出嘅錶款真係有啲難分，唔止個樣極似，連個名都分別不大。最近GO新推兩隻「日」、「月」雙傑，Senator Excellence Panorama Date，同埋Senator Excellence Panorama Date Moon Phase，咦? 好似出過啦喎，Panorama Date & Moon Phase呀嘛！GO迷細心啲睇，中間係多咗Excellence個字，卓越之處就在於佢地換上2016年頭嘅新機芯Calibre 36，意味著更高嘅精準度、續航力同穩定性。

Senator Excellence Panorama Date最標誌性係佢嘅大日曆設計，由兩個處於同一水平面嘅同心同軸轉盤驅動，兩個數字之間無分隔線；而Moon Phase款式嘅月相顯示則位於10點至11點位置之間，銀白色嘅月亮沿軌道運行，由品牌於德國Pforzheim嘅自家錶盤廠製造，以鑽石銑削方式研磨出好靚嘅曲線，格外優雅。

外貌雖靚，但主角仍然係Calibre 36新機芯，大日曆、月相兩項功能結構同機芯融為一體，而調整動作只需經由一個錶冠就輕鬆做到，唔需要額外喺錶殼上面加校正按鈕，用家方便之餘，亦表現出GO精湛嘅工藝同心思。機芯具備矽製擺輪游絲，確保極致精準度，單發條盒則以4赫茲 (每小時振盪28,800次) 之頻率，提供100小時以上動力儲存。

Panorama Date、Moon Phase 兩款新作都用經拋光及緞面磨砂處理的40毫米錶殼，各有Rose Gold同不鏽鋼俾大家揀。雙面防反光塗層的拱形藍寶石水晶鏡面，配搭銀色霜狀紋錶盤，表現GO素來稱著嘅典雅態度。不鏽鋼款嘅分鐘數字經雷射切割、黑色電鍍處理，而紅金款則用咗鮮紅色，更加搶眼；兩個款都會襯黑色鱷魚皮錶帶和針扣，仍屬品牌一貫傳統作風。