一個男人成熟與否，好視乎佢識唔識揀、對身邊事物夠唔夠Conscious，講得直接啲，就係對周遭嘅嘢有幾多掌握。喺威士忌嘅世界入面，我地飲開絕大多數嘅作品都係出廠之先經過加水稀釋，以控制酒精度數、風味嘅一致性；不過有啲寫住「Cask Strength」嘅原桶靚威就無經過呢個「維穩」過程，原汁原味裝瓶奉上。

唔知大家有無好奇怪，點解一般市面上嘅威士忌，可以每一枝都維持到咁一致嘅酒精度數 (ABV)。威士忌於橡木桶之中經歷陳年同天使分享Angel’s Share，而每個酒桶嘅狀態、環境其實都有些微差異，按道理，應該每桶嘅威士忌都有啲唔同先合理。

其實威士忌經陳年後，酒精度會大約喺50%至60%之間，而威士忌只規定酒液必需超過40%，可見兩個數字之間，仍存在一段距離。酒廠為咗令威士忌更易入口，亦為穩定每批出廠嘅作品，一般都會將原液加水稀釋至40%至46%，另外嘅步驟仲包括冷凝處理、加色等等。

Kavalan Solist Amontillado Sherry Single Cask Strength

而Cask Strength方式裝瓶嘅作品，就係指無經過任何稀釋，直接從橡木桶裝瓶嘅威士忌，擁有50%至60%酒精度，每枝嘅味道都可能有差異，不過呢啲原酒先係最接近原始狀態，可謂最原汁原味；所以大家會見到Cask Strength喺資深飲家嘅市場之中大受歡迎，因為大家都追求更豐富、真實嘅威士忌風味。

以水稀釋，或多或少都會影響酒液嘅原始風味；但品嚐Cask Strength，就如同將稀釋嘅權利握於手中，自己鐘意加幾多水都得，唔加水又得。不過有時呢啲權利並非與生俱來，各位唔努力爭取追求，就只好默默接受受人稀釋嘅作品。