史上最大隻 192cm高哥斯拉!!

文：MenClub 魏文青　　
POSTED ON 06 Nov 2016

香港啲樓有幾細，大家望望自己屋企就知，有時都真係覺得連自己都係唔應該存在喺間屋入面。既然係咁，你估仲有冇勇者會買呢隻有成192cm高，超過3米長，比起你本人仲大舊嘅哥斯拉返屋企呢？

呢隻哥斯拉造型來自1991年電影《哥斯拉對王者基多拉》，乃係史上出過最大隻嘅哥斯拉商品。而且唔好以為佢大而無當，今次Bandai搵黎知名哥斯拉造型師「酒井ゆうじ」老師做監督，先用電腦將酒井老師造嘅原型掃瞄，再由「Design CO-CO」公司以3D打印方式製造白模。所以細節方面做到相當出色。

之後再由人手參照當年電影所用嘅戲服配色，以人手噴槍上色，再造出眼睛、牙齒、爪等等部位嘅細節。就連重量都重新設計，令到佢可以靠自己企穩。造一隻都咁麻煩，難怪全球只係限量十隻——雖然我都好懷疑做多咗都冇人買——仲有酒井老師發出嘅「出世紙」添！

呢隻Human size ゴジラ 1991 北海道ver. 真真正正有「米九幾」高，同樣高嘅仲有佢嘅價錢——448.2萬Yen，即係接近34萬港紙！黎緊星期一喺「魂」開售，預計下年7月送貨。
Tamashii