錶迷角度，靚嘅錶款出多幾種質料嘅錶殼絕對係好事，Rose Gold、鉑金、陶瓷、精鋼，一隻腕錶可以從奢華演繹到親民，既能增加樣式變化，又可以俾市場更多選擇。上年發佈嘅Legacy Machine Perpetual萬年曆只有玫瑰金同950鉑金兩款，各限量25隻，今年Max再為呢隻萬年曆推多兩個白金款，舊酒新瓶，再次遇上也是溫馨。

Legacy Machine Perpetual係MB&F同愛爾蘭獨立製錶師Stephen McDonnell嘅心血結晶，不單止樣靚，更顛覆咗傳統萬年曆嘅固有技術。三大鐘錶複雜工藝之一嘅萬年曆，傳統方式係採用預設每月31日嘅設定，透過日期變換期間快轉多餘嘅日期，「刪減」小月天數不必要嘅日期；其中嘅出事位可以包括跳過日期、變換日期之間調轉而做成嘅機芯問題等等。

2015年推出之950鉑金與玫瑰金款式

而LM Perpetual則係用「機械處理機制」去取代Grand Levier系統結構，運作方式係將每月預設為28日一個循環，按需要而增加日數，意味住每個月份都有所需嘅確切日數，唔需要做跳過日期呢一步，亦唔會發生日期跳轉嘅錯誤。而呢個機制亦都有內建嘅安全功能，可以喺日期跳轉嗰陣，中斷快速設定按把嘅調校，消除損害嘅風險。

新18K白金款式，錶殼維持44mm X 17.5mm嘅Size，正背後面都有防眩光塗層嘅藍寶石水晶鏡。錶盤12點鐘位置係時、分顯示，3點鐘為星期顯示；動力儲存顯示喺4點鐘位置；正下方見到月份，而7點位則為逆跳閏年顯示，最後9點鐘係日期視窗。今年白金款有兩隻盤面，其一為限量25隻嘅幻紫色錶盤，而另一灰色錶盤款式則為非限量版本。