蘇格蘭Islay名廠Bowmore日前公佈一隻全黑色包裝嘅50年佳釀，細看之下原來係1964年蒸餾嘅陳年老酒。從1993年起經過4次極珍稀限量推出後，繼上次2007年去到而家，酒廠話俾大家知，Black Bowmore 1964年而家已經係最後一Batch，唔會再出。雖然枝酒售價高達£16,000，不過限量159枝嘅情況下，即使爸打們腰纏萬貫，都未必咁易買得到。

最後一桶Black Bowmore 1964用咗個好型棍嘅全黑色木盒包裝，襯返「Black」呢個主題。點解稱之為Black係因為當年釀製威士忌嗰陣，使用歐洲雪莉桶嘅比例相對較高，如果有玩開Whisky嘅朋友，應該記得Sherry會為酒液帶來更深邃嘅琥珀色，所以酒廠就以「Black」嚟命名呢個系列。

Bowmore Distillery Manager David Turner 形容，最後一桶嘅Black Bowmore唔單止向飲家們展示出非一般嘅深度同原料材大麥嘅質量，更加證明咗品牌喺威士忌市場入面嘅領先地位。其實，每間酒廠推出老酒時，所講嘅說話都差不多，就好似每間舖頭都有其鎮店之寶一樣，Macallan又好，Glenfiddich又好，大家都會拎嘢世紀佳釀嚟Showcase一下，顯示酒廠同品牌實力。

酒廠嘅官方Tasting Note講述，Black Bowmore 「1964」 50年威士忌經過半個世紀嘅熟成，其優雅風格更得以昇華，熱帶水果嘅香甜、沾有蜜糖香氣嘅黑松露，仲有Bowmore最標誌性嘅煙燻氣息；深邃嘅酒色顯示Oloroso雪莉桶嘅美妙作用，最後嘅製成品既優美、圓滿，亦充滿複雜性。