好多錶錶品牌都話自己有飛行員腕錶系列，但喺功能上嚟講，都係Breitling百年靈做得比較出色。最近佢地出咗隻Navitimer Héritage，復刻返1952年原版航空計時腕錶 (Navitimer)，配備雙向旋轉錶圈、環形飛行滑尺，仲有一Set精準嘅計時盤，係真正設計俾Pilot用嘅多功能腕錶。

現代民航飛機設計極之先進，Boeing、Airbus嘅Autopilot system已經係禁個制，架機自己識飛，不過喺Small Aircraft嘅世界，作為機師真係要自己計、自己處理好多資料先完成到一次飛行。今次同大家講下Breitling個環形飛行滑尺到底喺飛行上面有咩咁把炮。

當機師完成Flight Plan，坐上架機嘅時候，佢仍要時刻保持驚覺，確保架機係安全地、按計劃地飛行。計算時間、速度、距離，再用Compass、Navaids作出方向修正，一切動作都係實時進行，無得Pause。環形飛行滑尺最基本做到嘅嘢，就係兩數相乘、相除，利用可以轉動嘅外圈對應內圈刻度，可以輕易計到乘、除數。另外內圈刻度仲有KM、STAT、NAUT等單位換算功能，MPH速度計算。機師可以利用隻錶計到Flying Distance、Fuel Burn、Rate of Climb / Descend，所以話Breitling嘅環形飛行滑尺，係真正設計俾飛行員用。

可能你會話，現代科技咁先進，定位有GPS，電腦幫你計哂所有數，邊度需要一隻咁嘅錶呀? 其實再精準嘅機器都會有出錯，會損壞嘅時候，Backup、Redundancy係飛行安全嘅基本要求，機師手戴一隻Brietling，總比一隻無計時嘅普通三針要好。

新版Brietling Navitimer Héritage，擁有相對較細嘅42mm精鋼錶殼，配備自家製13型自動上鏈機芯，有天文台COSC認證，振頻每小時28,800次，提供不少於42小時嘅動力儲存。Chronograph計時精度達1/4秒，錶盤上面都見到30分鐘、12小時嘅累積計時器，此外仲有個日期示窗。黑色或者藍色錶盤，可以揀配返橡膠帶或者皮帶，橡膠款售價HK$47,610，而皮錶帶款則賣HK$48,120。