有好嘢唔怕多啲攞出嚟講，尤其喺鐘錶世界，大家都鐘意玩Heritage、復刻版，顯示自己個品牌有幾多經典作品，去到今時今日，都大把用家捧場。Tag Heuer近來就重新以黑色鈦金屬復刻2007年嘅發佈嘅經典款式，新版Carrera Calibre 16 Day-Date Chronograph Black Titanium用2級鈦金屬鑄造，經微噴砂處理，再加返一層黑色PVD塗層，輕盈嚟得亦不失質感。

話哂係復刻版本，梗係見返好多當年嘅經典設計啦，例如60年代Carrera所採用嘅大錶盤、上面嘅雙計時盤，仲有初代Carrera嘅刻面錶耳都一一重現。錶殼繼續維持返43mm，黑面之上有三個同色小錶盤，6點鐘位置一個小時計時盤，12點位一個分鐘計時盤，最後9點鐘位置嘅係小秒盤，日期示窗則坐落於3點鐘位置。

錶盤黑黃兩色配搭，阿拉伯小時刻度上面有米黃色嘅SuperLuminova夜光塗層，喺藍寶石錶底處見到Tag Heuer自家Calibre 16型星期日曆自動計時機芯，振頻每小時28,800次，有42小時動力儲存，擺陀會見到日內瓦波紋雕飾；當然呢啲高質機芯係有COSC天文台認證啦。

黑色鈦金屬版Tag Heuer Carrera Calibre 16將會配搭返懷舊小牛皮錶帶，增加Vintage感覺，錶帶上面有2級鈦金折疊錶扣附安全按鈕，都係經過微噴砂處理加黑色PVD塗層。