Single Malt、Single Grain，不必專業威士忌知識，由字眼上大家都推測到威士忌嘅原料，係來自不同嘅穀物，例如大麥、黑麥、黍米等等；不過，Whisky一詞，從來都無一套既定標準。MenClub前嗰排寫咗一枝Kikori Whiskey，原料係100%日本米，並無任何傳統麥芽成份，但就同樣以傳統方式蒸餾，再以橡木桶熟成。日本法例無寫明用米唔可以做威士忌，但美國則相反，對於Whiskey嘅種類有明確規定，而米 (Rice) 係無被規範化嘅。

以水稻釀酒，到底可唔可以稱之為威士忌呢? 坦白講，呢條幾乎係形而上嘅問題，好適合喺哲學堂做Exam Question。威士忌一詞，最初源自蓋爾語入面嘅uisge beatha，意思係指生命之水，泛指一切以蒸餾法釀製嘅酒液，一如淬煉生命之精髓一樣，烈酒又有Spirits呢個名。

除咗威士忌之外，仲有干邑 (白蘭地)、伏特加都可以叫自己做生命之水。雖然無明確規定，但多年來威士忌都憑藉穀物、橡木桶兩大元素去創造多種獨特嘅風味，而世界各國皆以呢兩個方向立法規管威士忌，例如蘇威至少都有3年於橡木桶嘅熟成時間。

問題返去Kikori呢枝「威士忌」身上，100% Rice做原料，「米」毫無疑問係「穀物」嘅一種，而Kikori嘅原液又經歷咗3至10年嘅熟成時間，以廣義嚟睇，Kikori披上威士忌之名，合情合理。Kikori創辦人Ann Soh Woods就話自己係希望創造一隻比較輕盈、舒服嘅威士忌，所以一開始個製作過程同燒酎一樣，但後尾又再跟返傳統威士忌嘅陳釀方式，以美國橡木桶、歐洲雪莉桶同埋法國橡木桶做返個複雜、豐富嘅風味出嚟。

繼Kikori之後，市場上又再湧現「大石」、「深野」呢類標榜水稻釀製嘅Whisky作品，個性會比較柔和，襯返日威嘅和諧特色，其實亦無不可。同玩錶一樣，每一種藝術品都有死忠Fans，有啲人會話Smart Watch唔算係真正嘅錶，又有啲人會話水稻威士忌並非真正嘅Whisky，不過，識得玩，又何必劃地自限，試過Rice Whisky，話唔定你會愛上佢獨特嘅輕盈口感呢?