緊隨《聖經》之後，全球最暢銷書籍係一本俾大人睇嘅童話故事書 — 《小王子》。呢本唔駛兩個鐘頭就睇完嘅故事書，竟然可以蘊含咁多道理，令你喺人生每個階段睇完之後都有唔同領受，稱為歷史上最偉大嘅著作亦不為過。《小王子》篇幅雖然精簡，但內裡嘅道理一直為人津津樂道，其中最適合情侶嘅一段，肯定要數小王子與玫瑰、同埋狐狸嘅故事。因為兩個人相處過，彼此認識、影響，建立咗一份世上獨一無二嘅關係，所以先令對方成為70億人入面，最特別嘅存在，未必係最靚、最好身材，亦唔係最富有、最有才華，單單係因為佢，所以先愛上。

IWC上年就出咗一系列嘅《小王子》特別版，要揀情侶錶，亦無理由唔搵小王子借題發揮一吓嘅。不過，唔止IWC，其實好多腕錶品牌，都無話到明邊隻係男裝錶，邊隻係女裝錶，反而好多都走中性路線，任君配戴。如果要揀女裝款，其實收細返少少Size，搵隻線條比較優雅，設計較為簡約嘅已經OK，但時興大錶，女仔戴隻40mm，實在一啲問題都無，視乎比例上好唔好睇嘅啫。

IWC Pilot’S Watch Chronograph Edition “Le Petit Prince” – Ref. IW377714 (HK$40,700)

男裝款係43mm，精鋼藍面嘅《小王子》特別版計時碼錶，屬於IWC嘅入門系列，其實個價錢都幾抵玩，趁情人節買隻俾自己都唔錯。Chronograph錶盤，設有小時、分鐘、秒鐘嘅計時功能，右手邊3點鐘位置除咗日期之後，仲有埋個星期顯示，充份填滿43mm嘅巨大空間。雙面防反光凸狀藍寶石玻璃錶鏡、IWC Crown旋入式錶冠，錶底仲有個安東尼．聖艾修伯里喺1940年代繪製 — 身穿大衣、攜帶佩劍嘅小王子印記。腕錶搭載79320型計時機芯，滿鏈可以提供44小時嘅動力儲備，襯埋Santoni棕色小牛皮錶帶，真係相當之靚！

IWC Pilot’s Watch Mark Xviii Edition “Le Petit Prince” –Ref. IW327004 (HK$33,200)

女裝款呢度揀咗一隻來自Mark18系列嘅小王子特別版，去襯返男裝錶隻Chronograph，同樣係精鋼錶殼加藍色錶面嘅設計，但尺寸方面就比男錶細少少，去到40mm，但時下好多女仔都帶大錶，問題不大，反而注目度、辨識度會更加高添。腕錶配備IWC.30110自動上鏈機芯，提供一個大三針加日期視窗嘅功能，上滿鏈之後，可以有42小時嘅動力儲存。另外同男裝錶款配成一對嘅仲有個棕色Santoni小牛皮錶帶，同埋絕對唔少得，印喺錶底嘅小王子印記呀嘛！