德國功藝踩過界 Ballfinger盤式錄音機及唱盤

文：MenClub 魏文青　　
POSTED ON 14 Feb 2017

如果大家認識德國廠商「Ballfinger」，如無意外就應該係因為佢哋出過四四方方嘅「TRIPLEX」系列腕錶，又或者因為佢出過一盞用球形關節嘅現代檯燈。但或者你依家就要認識埋佢另外一面——原來佢係有出音響嘅！眼見黑膠復興，又一心矢志要為鍾意Analog多過Digital嘅人提供多一個選擇，Ballfinger由2013年開始就始研究一部唱盤同一部「盤式錄音機(Reel-to-Reel Recorder)」。等到4年後嘅2017年，佢哋就終於喺「北德音響日2017(North German Hifi Days 2017)」發佈咗「M063盤式錄音機」同「PS 2唱盤」。

先講下「M063」，據稱售價超過27000歐元嘅M063定位上係一部專業用錄音機，當然如果你好鍾意靚聲同畀得起錢，佢哋都會照賣畀你嘅。佢嘅特色係裏裏外外，由個鋁殼到入面嘅靜音無刷式摩打都係Ballfinger自己製作。轉速方面由轉速計同電腦控制，分別有每秒7.5吋同每秒15吋選擇，亦可以播放12吋嘅盤式錄音帶。而且採用模組設計，可以輕易更換Ballfinger之後出嘅模組黎擴充功能。

至於「PS 2」唱盤就相對簡單啲，同樣用上Ballfinger先製嘅無刷式摩打，配上重達5KG嘅鋁金屬唱盤，簡單得黎好好高雅咁。另外仲可以設定為手動同半自動模式——影響嘅其實只係播放開始同完結時，唱臂係自己移動定係要用家手動。「PS 2」售價未定。

當然，唔係話德國出嘅嘢就一定好嘅，不過見到Ballfinger呢份心機、呢個設計，又確係幾令人佩服嘅。