一般黎講，經理人都係擔任幕後角色，就算你幾鍾意個藝人都好，你可能連佢個經理人叫咩名都講唔出。不過呢個世界就總有啲例外，好似今晚要同大家介紹嘅呢位「かとゆり(Katoyuri)」咁，就係一個紅過自己隊藝人嘅經理人啦！

「かとゆり (直譯為加藤Yuri)」係一名現年22歲嘅日本網紅，其「成名作」係去年4月時以「獨居的上智女大學生」之名，接受有483萬訂閱嘅日本著名YouTuber「Hikaru」嘅訪問，並公開咗自己屋企。縱然影片內容其實非常平凡，但佢出色嘅外表、可愛嘅氣質就已經成功俘虜萬千網民，令其一炮而紅。

而據佢自己於社交媒體中透露，佢目前係上智大學理工部情報理工學科嘅現役女大生，而且更係日本地下偶像團體「ルルネージュ」嘅經理人，再加上佢個仲有個超過38萬個追蹤嘅TikTok要經營，難怪佢自己話忙到冇時間拍拖啦。

近日佢更加為《Young Jump》獻出自己嘅初水著寫真，展現出不輸現役偶像嘅美好身段——講起「不輸現役偶像」，佢做經理人個團體「ルルネージュ」目前Twitter上有大約八千個Followers，但佢本人個Twitter就已經接近萬三個追蹤，拋離團體超過一半；團體個IG更係只得百令個人Follow，比起佢自己個IG有成11萬人相差極遠。咁搞法，佢個經理人睇黎都做唔長啦。

IG：katoyuridayo