相信大家都有聽聞過，有御宅族男性因為極度喜愛某個二次元女角，不單止將角色稱為老婆，甚至有人付諸行動，與二次元角色結婚。但其實迷戀二次元角色呢家嘢，並非男性專利。好似今晚要同大家介紹嘅呢位「あかせあかり」，就極度沉迷手機遊戲《IDOLiSH7》中嘅角色，甚至同一套動畫電影睇咗77次！

現年二十一歲嘅「あかせあかり」，中學時期曾經係排球部嘅經理人，引退後就開始參與cosplay活動，並因為其可愛外表再加出色打扮，於TikTok吸引過百萬Fans，更被封為「2.2次元Cosplayer」(即係介乎二次元與現實之間，但又更貼近二次元嘅意思)。由於其人氣強勁，同年獲《週刊Playboy》邀請進行首次水著寫真拍攝，並於同年推出首本電子寫真集，正式開始其寫真之路，並再踏足演員工作。

近來因為出演新電視劇，所以事隔兩年再次接受《週刊Playboy》訪問兼拍攝。訪問中談到近況時，佢表示自己沉迷手機遊戲《IDOLiSH7》有8年之久，而作品嘅衍生動畫電影於今年5月上映，兩個月黎佢入場睇咗77次，幾乎係每日都去睇一次，仲要每次都真係去睇偶像演唱會咁落力。甚至當被問到對現實戀愛有冇著落之時，佢仲答：「近排對真人冇咩興趣呢！」睇黎真係全心投入二次元嘅世界啦！

IG：akaseakari_official