早幾個月嘅AI熱潮之中，唔少人都睇過，甚至親手用如Stable Diffusion、Midjourney等AI圖像生成工具整過啲「AI美女圖」出黎。但當時因為技術所限，所以只要有心，大家依然能夠從圖中搵出分辨「真圖」同「AI圖」嘅破綻。事隔幾個月，雖然AI熱潮就略為減退，但就仍然有人努力鑽研相關技術，Facebook上甚至出現一個「AI生成美女圖」專頁，而入面嘅「AI圖」幾乎已經去到「毫無破綻」嘅地步！

目前嘅「AI圖像生成」技術，主要係透過用家向系統提出各類「指示 (Prompt)」，例如輸入「香港」、「長髮」、「年輕」、「女性」咁，系統就會自動生成一張包含「指示」嘅圖片出黎。而成品嘅好與壞，除咗取決於系統本身嘅能力，以及用家嘅指示詞及比重調較之外，網上更有各種類型嘅「插件 (由第三方訓練出黎嘅資料包)」令系統能夠更準確地生成各類人、物。換言之只要用家純熟選用指示詞，再加上各種插件，就能夠大大提升「AI生成圖」嘅「可信性」。

而呢篇文入面嘅所有圖片，都係來自Facebook上嘅一個泰國專頁「AI :3」。呢個專頁由一個 (或一班) 不具名嘅泰國用家創立，會頻繁但不定期地發佈佢哋用Stable Diffusion整出黎嘅「AI美女圖」。每輯圖都會有唔同主題，圖中女性嘅外表、身材、衣著以及所處環境都會有所變化，而且像真度比早幾個月於網上流傳嘅「AI美女圖」高出甚多。例如過往經常成為破綻嘅手指，依家已經有大幅改善 (但未完美)；而光影表現亦比過去嘅AI圖像真得多。唔好話事先唔同你講佢係AI圖呀，就算講咗你都未必搵得出個破綻！相信無論大家係純粹鍾意睇靚女，定係想考下自己眼力，呢個專頁都足夠大家消費磨大量時間。 

Facebook：AI :3