俗話有云：三歲定八十。唔少人都認為能夠從一個人小時候嘅性格行為甚至外貌，推斷佢長大後究竟發展成點。但如果講緊嘅係今晚要介紹嘅呢位「冴木柚葉」呢，呢句說話就未必準確啦！事關佢細個唔單止係個肥妹，而且一日到黑掛住瞓覺，你又點會估到佢將來會成為寫真女神呢？

現年24歲嘅「冴木柚葉」近年乃係雜誌寫真常客，幾乎登上過所有日本青少年雜誌，不過佢出道早年嘅發展其實唔算太順利。據佢早前接受《週刊Playboy》訪問時回憶，當年佢係於高中畢業翌日被經理人公司發掘而入行，但好快就因為疫情關係而完全零工作，一日到黑喺屋企睇動畫渡日。如是者「耍廢」一整年後佢自己都覺得唔對路，於是開始努力經營TikTok，仲一嘢減咗10kg成為你依家見到姣好身型。終於於2022年疫情過去後成為日本長壽情報節目《王様のブランチ》嘅記者，人氣亦因而爆發。

而除咗肥之外，「冴木柚葉」亦提到自己讀書時唔單止冇朋友，仲因為一上堂就瞓覺而被封為「睡公主」，搞到成績係全級最後幾名。人哋一年見兩、三次家長已經好誇張，但佢一年可以被見六次家長。再加上佢從小就非常唔識用電腦，所以好早就知道自己無辦法成為一般打工仔。好彩係咁，佢先會向幕前方向努力，大家依家先可以睇到佢啲靚相咋！

IG：yuzuha_saeki