如果你只係睇「松山あおい」嘅寫真照，你可能會以為佢又係一個以嬌小身型作為賣點嘅「蘿莉向」寫真女星，但當你望望佢個個人資料，你先會發現原來佢已經30歲，繼而發現佢本職係一個「創意歌手」，如果你再做多少少資料搜集，更會發現佢原來係經過非常多事，以及非常努力，先會走到依家嘅位置！

話說「松山あおい」細細個時就因為鍾意動漫歌曲而有個歌手夢，所以自高中時期就已經不停參加各種試鏡、試音，但都全數落選。高中畢業後佢一邊喺遊戲機中心打工一邊繼續試鏡，到20歲嗰年先被一間小型經理人公司睇中成為地下偶像歌手。但由於公司規模非常細，而佢又冇咩知名度，出道初期只能於「經常表演者多過觀眾」嘅場地表演；後來公司叫佢去街頭busking，如是者佢又過咗一段每日喺街對住「0至3人」唱歌嘅日子。壓倒駱駝嘅最後一根稻草，就係公司話佢已經冇咩發展空間，想突破就要出自己嘅歌，而製作費100萬要佢自己出！覺得自己遇上詐騙嘅佢離開公司。

離開後「松山あおい」改為自由身偶像歌手，即係由製作音樂、上台表演、表演服裝、製作週邊、經營社群及YouTube都由自己一手一腳包辦。結果多次於「ニコニコ超会議」登場後終於走紅，後來更自己籌錢製作個人動畫《松山あおい物語》於埼玉電視台播放。可以話演藝事業嘅每一步都係自己行出黎！所以大家睇佢啲寫真時，請記住佢唔單止係一個靚女，仲係一個為咗夢想奮鬥到依家嘅靚女！

IG：aoi_oix2