日本媒體經常會為寫真女星起「朵」黎製造話題，但所謂「創意也有涯，而女也無涯，以有涯隨無涯，殆己」，所以有時就會出現連起朵都撞名嘅情況。好似今晚要介紹嘅呢位號稱「令和最強メリハリボディ」（減り張りBody）嘅「辻りりさ」咁，就同人「撞朵」啦！

現年27歲嘅「辻りりさ」細個本來係跳古典芭蕾舞，但後來因為身體太過瘦弱而被逼放棄；同時佢小學到初中期間亦曾做過童星拍過廣告，但又因為對住鏡頭好怕羞而早早引退。大學畢業後本來想做個記者，但最後仍然放唔低演藝夢，所以即使已經收到其他公司Offer，仍然決定到最後一刻放棄，與經理人公司簽約，最終於2020年成為寫真女星出道。早前仲黎咗香港擔任拳賽女郎添！

出道後嘅佢唔單止於寫真界高速發展，同時亦努力改善自己嘅身材。其實多年黎嘅芭蕾舞經驗已經令佢嘅身態相當優美，但佢就認為要再進一步，追求「胸與腰嘅高低差」，亦即上圍儘量凸出、腰線儘量細小先可以吸引大家注意。

而正正就係因為有呢個想法，所以佢就努力健身，而且唔係為咗減肥，仲係為咗練肌肉。事實上標題中「メリハリボディ」（減り張りBody）中「メリ」（減り）係「減」、「ハリ」（張り）係「增」，加埋一齊就即係大家近年經常聽到嘅「增肌減脂」。而睇佢啲相，你都知佢嘅健身成效相當唔錯。

不過，日本另一知名寫真女星「澄田綾乃」，其實都有個一模一樣嘅稱號。至於邊個更適合呢個「朵」，就留畀大家自行評價啦。

IG：t_ririsa