由KOTAKE CREATE開發嘅恐怖遊戲《8號出口》，自去年宣布翻拍真人版後，就引起唔少機迷討論，大家都好奇一款無故事情節嘅遊戲點樣改編成電影。官方喺今日就公開全新預告，確定由二宮和也主演，預計今年8月29日在日本正式上映。

從短短30秒嘅預告可見，電影忠實還原出遊戲地下通道場景，二宮和也將飾演主角「迷路男」，而河内大和則扮演「詭異大叔」。同原作唔同嘅係，電影版加入咗幾位新角色，包括一位小朋友、一位白衣女子，以及一位短髮女士，唔知佢哋嘅身份又係咩呢？

《8號出口》係一款第一人稱懸疑解謎遊戲，玩家將置身於日本車站嘅地下通道，目標係搵到8號出口。但如果淨係跟住牆上嘅指示牌行，就會好似「鬼揞眼」咁，不斷係重覆回到相同嘅景場。通關嘅方法就係要搵出場景入面嘅異象，見到怪事就要立即掉頭走，如果一切正常就照直行，直至搵到8號出口為止，否則將永遠困在無限迴廊之中。遊戲憑藉獨特嘅玩法及出色嘅氛圍營造，自2023年推出後吸引大批實況主進行直播，深受恐怖遊戲迷歡迎。