所謂「男兒口大食四方」，原文下句本來就係意思唔太好嘅「女兒口大食窮郎」，但21世紀都過咗四份一啦，依家啲女人仲邊使靠老公食飯呀？所以計我話「女兒口大」一樣都係「食四方」。好似今晚要介紹呢位「木下遙」咁，佢依家就真係算食緊「四方飯」，因為佢係一位攻打四方城——即係打牌呀——嘅職業雀士！

今年28歲嘅「木下遙」於拍寫真之前就已經有頗為豐富嘅演藝經驗。出身於北海道嘅佢本來就讀青森縣嘅弘前大學，就學期間先後成為「弘前大學小姐」以及「弘前城櫻花小姐」，之後就吸引到經理人公司青睞而簽約，畢業後更曾經成為北海道電視台嘅天氣主播及節目主持。不過短短兩年後佢就決定辭職搬去東京，唔係為咗要加入更大嘅電視台，而係希望將佢嘅另一愛好——打牌——變成自己嘅職業！

據佢接受訪問時指出，自己大學時就已經好鍾意打牌，即使出社會後仍然放唔低呢份熱情。所以搬去東京之後佢就去考日本嘅職業雀士證照，並於2022年起開始參加日本職業麻雀聯賽，雖然成績唔算特別好（目前係E2聯賽成員），但都算係完咗夢呀！

亦係佢呢個職業雀士嘅身份夠特別，所以就吸引到日本著名雜誌《FRIDAY》邀請佢合作，去年一口氣推出咗三本電子寫真集，從此踏足寫真界。唔知各位又認為佢嘅寫真成績，會唔會超越佢嘅麻雀成績呢？

IG：kino__haruka