如果你平時冇追開日韓偶像，可能對於今次標題入面個「Visual」有啲疑問：「Visual」咪「視覺」囉？點樣最強呢？係咪視力好好呀？但其實係偶像界中，Visual（日文：ビジュアル）其實係「顏值」咁解，換言之能夠被稱為團體「Visual擔當」嘅都係顏值最高嘅一員。而「山本杏」就被稱為「最高Visual女孩」，以下就同大家睇睇佢係咪真係咁靚女！

現年19歲、出身於日本神奈川縣嘅「山本杏」，最早係以日本著名少女時尚雜誌《Popteen》旗下嘅「7+ME Link」企劃推出嘅第二個女團「PureGi」初期生身份出道。但佢嘅真正成名作，就係於去年參加由講談社主辦嘅年度寫真選美比賽「Miss Magazine」，並一舉獲得等如亞軍嘅「Miss Young Magazine賞」，只係輸畀我年頭為大家介紹過「大」器晚成嘅「葉月くれあ」，可見佢嘅寫真實力。

雖然有一張圓臉嘅佢未必符合所有人嘅喜好，但相信大家都無辦法否認佢的確非常可愛，某啲角度甚至有啲「後生版白石媽媽」嘅感覺（呢句讚賞黎㗎下）。或者就係咁，所以日媒亦認為佢有「小惡魔」嘅氛圍。唔知各位對佢又有咩評價呢？

IG：anyamamoto0516