改編自夢工場同名動畫嘅真人版《馴龍記》（How to Train Your Dragon），在上周於全球各地陸續上映，開畫短短幾日已狂收1.97億美元票房，成績遠超原版動畫三部曲開畫紀錄。同時亦係繼真人版《史迪仔》大賣後，再次證明動畫翻拍真人電影依然充滿吸引力。

據票房統計網站《Box Mojo Office》數據，真人版《馴龍記》在北美開畫首周末3天票房為8,300萬美元，高過業界先前預測嘅7,000至8,000萬美元，而海外市場則進帳了1.14億美元，其中以墨西哥（1,400萬美元）、英國（1,120萬美元）及中國市場（1,120萬美元）貢獻最多，全球開畫票房合共為1.97億美元。據了解，電影製作成本為1.5億美元，而宣傳費就大約1億美元，以目前嘅勢頭，要回本絕對唔係難事。

真人版《馴龍記》由原動畫三部曲導演Dean DeBloi回歸執導兼編劇，並搵嚟曾出演《接駁靈聲（The Black Phone）》嘅17歲美國演員Mason Thames飾演思噎仔，HBO《最後生還者》Nico Parker飾演亞翠，而在動畫版聲演思噎仔父親高大威煞刀嘅Gerard Butler今次更親自出演該角色。故事背景同劇情走向基本上同原著一樣，新新觀眾可以感受到經典魅力，舊Fans亦能透過新嘅真人形式重溫情懷，目前電影現正上映中。