我成日都話無論係日本媒體為咗吸引收視、又或經理人公司為咗幫旗下藝人打響名堂，都會幫新入行嘅偶像、藝人用個人特點起個花名，方便大家記得佢係邊個。而正當我以為經過咁多年，絕大部份嘅花名大家都見慣見熟、萬變不離其中時，勢估唔到近日竟然見到個充滿創意嘅新花名「靈長類最強」！咁究竟被冠上呢個花名嘅「石原さき」又有幾強呢？

2007年出世，今年2月啱啱滿18歲嘅「石原さき」，最早於2021年，以知名女團「#ババババンビ」嘅師妹團「#よーよーよー」創團成員身份出道，但到2023年年初時佢就於公司安排下退團，並於同年改以現屬團體「#Mooove」再次出道，成為團內年紀最小嘅成員。去到2024年時，或者係因為新團體後需要曝光，亦可能係因為佢當時咁啱「夠秤」拍寫真（日本個「秤」同其他地方唔同啦下），反正就於《週刊Young Jump》獻出單人寫真處女作，結果就一鳴驚人。

有幾驚人呢？最直接嘅觀察就係佢多咗兩個花名，第一個係「奇跡的17歲」。需知道自從橋本環奈當年以「千年一遇」、「奇跡的一枚」等關鍵字一夜爆紅之後，類似嘅字眼已經唔係隨隨便便就可以用，用得「奇跡」兩隻字就證明大家認為佢有機會達到「環奈BB」嘅高度。而另一個花名就係標題中嘅「靈長類最強」，雖然實際上冇咩資訊性，靚過、好身材過隻猩猩似乎又唔係咩吸引之處，但單單係能夠激發出一個新花名，就已經算係一種成就啦？唔知各位又睇唔睇好佢嘅未來發展呢？

IG：isihara27saki