由韓國開發商Shift Up製作嘅動作遊戲《劍星》（Stellar Blade）最近推出PC版後，再創一波銷量，短短3日就賣出100萬份，全平台累計銷量突破300萬份。為慶祝呢個重要里程碑，Shift Up向每位員工贈送一部Nintendo Switch 2，仲暗示遊戲有可能移植到Switch 2平台。

據韓媒報導，Shift Up為慶祝《劍星》銷售突破300萬份，最近向全體300多名員工贈送一部Nintendo Switch 2。除咗係獎勵員工嘅努力，呢個舉動仲係公司「擴展平台、延長IP生命力同推動多平台策略」嘅一環。與此同時，Shift Up亦透露目前正「考慮」開發Switch 2版《劍星》，不過一切都尚未確定。

事實上， Shift Up都唔係第一次送遊戲機畀員工，早在2021年9月《劍星》(當時仲係叫緊《Project EVE》)於PlayStation Showcase活動首次亮相後，Shift Up CEO金亨泰就向全公司200多名員工贈送一部光碟版PS5。到咗今年1月，Shift Up又為慶祝遊戲大獲成功，向每位員工贈送出一部PS5 Pro主機及500萬韓元獎金（約HK$28,500），呢啲公司真係值得大力讚揚！