元朗出名多嘢食，B仔涼粉、華嫂冰室等等，紅到區外人都特地過海一試。不過其餘的，唔代表冇料到，臥虎藏龍的食肆多的是。有元朗地膽透露，又新街B仔涼粉分店附近，有間七十一，一定要試！

喂！特登入元朗去食七十一？呢間嘢港九新界周圍都有喎，是咪玩嘢先？咪激動～此七十一笨唔係便利店，而係腸粉非常出色的「七十一肥仔記」。

聽講十幾年前，元朗教育路7-11便利店外，有檔推車仔腸粉，好多街坊幫襯。後來呢個車仔檔，成功喺教育路開了屬於自己的店，名為七十一肥仔記，就是想讓人知道，佢就係多年來喺7-11門外，賣腸粉的車仔檔。

雖然七十一肥仔記有段時間消失了，令不少元朗人為之歎息，以為再冇機會食到咁好味嘅腸粉。好彩，原來肥仔只係再次搬家，今次就搬了去B仔涼粉分店附近，於又新街站穩陣腳。

由以前街邊檔做到入舖，七十一肥仔記的食物質素一直都相當穩定。老闆特地選用出名又薄又滑的潘記腸粉，柔軟滑溜的口感，同深水埗出名的合益泰小食不相伯仲。

七十一肥仔記的腸粉有淡淡米香，加上豉油、麻醬、甜醬和芝麻，以及香噴噴的豬油，聞到已經流晒口水。不同於一般的醬汁，呢度所調配的醬汁都較稀，不會單單鋪在腸粉表面，經撈勻後，腸粉由外至內，都充分吸收了醬汁，染上顏色，連腸粉卷中亦有味道，非常惹味。

七十一肥仔記

地址︰元朗又新街40號
電話︰（沒有）
營業時間︰星期一至日︰14︰00 - 02︰00（星期三休息）
價錢︰$50以下