食物唔一定色香味俱全，就好似臭豆腐、榴槤呢啲大家公認臭爆嘅食物，卻出乎意料咁好食，即使人人都話佢臭，但愛佢嘅人就好似「情人眼裡出西施」咁，覺得呢種味道香到爆！其實除咗以上講嘅兩種食物成日畀人嫌佢臭之外，大蒜都係其中一樣經常被嫌棄嘅食物。鍾意大蒜嘅人當然覺得佢勁香，加入菜式裡面仲會份外惹味！

而家你終於可以將呢份惹味昇華到極致！因為日本即食麵品牌「ペヤング」新出咗一隻超濃味大蒜撈麵「ペヤングにんにくMAXやきそば」！雖然話大蒜真係好好味，但其實唔係人人都受得住大蒜咁濃烈嘅氣味，特別係食完之後，口裡面嘅大蒜味會久久未散，呢點先最令人崩潰！為咗唔喜歡大蒜味嘅人著想，超濃味大蒜撈麵連包裝上都特別註明氣味可能會影響周圍嘅人，建議一個人享用，可想而知佢嘅蒜味有幾重手！