法國運動品牌DECATHLON登陸香港三年，為大家提供各式各樣熱門、冷門運動用品，上年大家亦都推介佢哋行山背囊又平又好用。而除咗目前有嘅旺角、銅鑼灣及將軍澳分店之外，DECATHLON黎緊就會於中環及九龍灣德福一口氣開兩間分店！

即將於10月初開幕嘅中環店以「Work Life Balance」為主題，產品主打健身及瑜珈用品，明顯係針對中環返工嘅西裝男及OL們。據新聞稿指，中環分店門口會有隨日夜轉色嘅LED呼吸燈，象徵跳動嘅香港人生命，亦會利用「互動科技」為人容介紹產品。

而德福分店就以「Click & Collect」、「Grab & Go」為理念，其實睇字都大概估到係咩，基本上就係想縮短大家排隊畀錢嘅時間。例如「Click & Go」就係網店落單畀錢，一個鐘後落分店拎貨，「Grab & Go」就係用店內自助櫃檯畀錢，或者直接用App自己嘟再用信用卡找數，不過就會員專用，而且只限店內使用。