唔少人出於健康或儀容考慮，都會選擇透過控制飲食同運動減去身體多餘脂肪，但無論咩減肥方法都好，最重要都係自律同堅持，只要抵受唔住美食誘惑就會前功盡廢。最近新西蘭奧塔哥大學研究團隊就開發咗一種新型減肥工具「DentalSlim Diet Control」，將一款磁石裝置安裝喺上排及下排大牙，防止嘴巴張開超過2mm，間接阻止用戶食固體食物，以解決肥胖問題。

根據刊登喺《British Dental Journal》嘅研究報告，研究團隊認為比起昂貴而且侵入性嘅減肥手術，呢款工具就平得多兼可逆，危險性都較低。為測試工具成效，研究團隊搵嚟7位健康肥胖女性志願者展開為期14日實驗，為避免意外發生，研究員亦有向每位志願者配備緊急解鎖工具。實驗期間，7名志願者每日都會進食1,200 kcal流質食物，另外加多款含25g蛋白質嘅奶昔，最終每位志願者平均減重6.36kg（佔佢地體重約5.1%）。據了解，雖然冇志願者喺實驗期階打開裝置偷食其他食物，但其中一位志願者就自爆曾經偷食融化咗嘅朱古力同汽水作弊。

「DentalSlim Diet Control」實物圖。（圖片經模糊化處理：截自British Dental Journal）

但網友們睇嚟就唔多接受呢款「新潮」減肥工具，唔少人都喺奧塔哥大學Twitter留言鬧爆研究團隊，表示呢個唔係減肥工具，而係中世紀嘅刑具。