據《New York Post》報導，41歲美國男子Moses Gibson因為身高只有165cm，從細就感到非常自卑，亦因此而識唔到女朋友。為求增高，Moses Gibson試盡各種辦法，包括從網上購買聲稱能夠增高嘅藥物，甚至尋求靈性治療師幫助，可惜通通都未見成效，於是決定聽從外科醫生建議接受增高手術。

為賺取高昂手術費，Moses Gibson除咗係一名軟件工程師，夜晚仲兼職揸Uber，花咗三年間終於儲到75,000美元（約58.9萬港幣）於2016年進行第一次增高手術，從165cm增高約7.6cm至172.6cm。但嫌仲未夠高嘅Moses Gibson，喺今年3月再花98,000美元（約76.9萬港幣）進行第二次手術，預計會再高多5cm，增高至177.6cm。Moses Gibson表示，增高手術令佢重拾自信，並開始敢同異性交談同著短褲影相，如今亦如願以償識到女朋友，仲鼓勵其他矮男都可以嘗試增高手術，認為非常值得。

對於上述行為，有網友就覺得Moses Gibson捉錯用神，正如《審死官》宋世傑夫人話齋：「男人生得高係冇用㗎，至緊要係心頭高吖嘛！」認為Gibson識唔到女仔嘅主因係冇自信、眼神流露出恐懼及不安感，與身高無關，更例舉一系列荷里活著名男星，如Tom Cruise（170cm）、Daniel Radcliffe（165cm）、Robert Downey Jr.（173cm）、Martin Lawrence（170cm）、Al Pacino （167cm）等人，指出唔高亦可以充滿魅力。唔知大家又點睇呢？