{ SKIP }
文:MenClub Mr.波特  圖:互聯網
POSTED ON 13 Jul 2017


今年NBA夏季聯賽絕對可以用令人驚喜黎形容,因為一眾排名前列嘅新秀表現都令人滿意(除左76人狀元Fultz因傷無法上陣),其中包括湖人嘅榜眼Lonzo Ball、塞爾特人嘅探花Jayson Tatum、太陽嘅Josh Jackson都接連交出好表現。而今日與76人嘅賽事,Ball繼上仗交出三雙數據後,再次交出驚人表現,令人覺得湖人今次真係無入錯貨!




面對76人呢場比賽,騎士「大帝」LeBron James亦有到場睇波,可見兩支隊伍都絕對受到高度關注,但較為可惜嘅就係76人嘅狀元Fultz因傷繼績缺陣,令本來狀元vs榜眼嘅大戰需要延後。既然無左狀元同佢對位,咁Ball就自然輕鬆得多,而比賽結果亦都真係咁。


全場比賽雖然76人一直都較湖人更出色,但係就無人可以限制到Ball,呢位榜眼今仗多次如入無人之境咁殺入76人內線上籃得分,而佢亦再次向球迷證明自己嘅助攻能力,多次以Kevin Love絕技「棒球式長傳」助攻隊友快攻得分。


不過即使76人無左狀元坐陣,佢地整體實力都係比湖人更高,所以喺第3節佢地就曾最多領先湖人15分。不過,Ball成功喺第四節接管比賽,佢個人單節獨取15分,成功從落敗邊緣一手將湖人拉番黎,最終喺比賽最後21秒命中一記2+1,成功反超對手,最終湖人以103:102成功逆轉76人取得勝利。


喺比賽入面Ball雖然亦有唔少失誤(全場6次失誤),投射三分球亦有Air Ball,但係佢仍然係今仗全場表現最好嘅球員。Ball今仗上陣左36分鐘,22投12中,三分球10投3中,罰球12罰9中,取得全場最高嘅36分,外加11助攻8籃板5抄截2封阻,全能身手完美展現比所有球迷睇,而最後一節嘅表現Ball亦展現出殺手本能,就係佢成功一手將勝利拉番黎。以咁精彩嘅表現黎為湖人帶黎勝利,最開心嘅除左Ball本人之外,相信佢父親LaVar Ball亦都開心死,因為佢又可以再同人講咁樣足以證明佢個仔係勁過LeBron James、Stephen Curry、Russell Westbrook等人啦!


睇完Ball今仗出色嘅表現,新球季最佳新秀呢個獎真係好難預測,除左Ball、Tatum、Jackson係大熱門之外,狀元Fultz之後復出嘅話亦都絕對係大熱門之一。另外唔好唔記得,76人仲有上年嘅狀元Ben Simmons,呢位擁有7呎身高卻可以打控衛嘅球員亦都係令人相當期待,而佢嘅實力亦絕對有力去爭最佳新秀獎項。



不過無論點都好,湖人真係搵到一位值得佢地栽培嘅超級新人,除左佢喺進攻端相當全能之外,佢嘅防守亦都非常唔錯,佢嘅飛身封阻真係令人眼前一亮,難怪湖人果斷放棄D’Angelo Russell,因為Ball真係一位難得一見嘅天才球員呢!




繼2015年「LEGO IDEAS 21303」後,LEGO事隔十年再次推出Pixar動畫《太空奇兵威E(WALL-E)》模型。而且今次除咗有主角威E,就連伊芙(EVE)、清潔機械人毛仔(M-O)同小蟑螂(Hal)都有份! 呢款模型由 ...
hobby
【玩物】LEGO重推《太空奇兵·威E》積木套裝 今次仲加入EVE及M-O!
05 Aug 2025
如果有留意科技產品嘅朋友,應該知道科技公司好鍾意拍廣告諷刺競爭對手,抽擊對方產品痛點。隨住Google將於8月21日推出全新Pixel 10系列手機,佢哋最近就出咗條廣告,諷刺Apple承諾嘅「新Siri」至今仍未見蹤影,與其 ...
hobby
【科技】Google Pixel 10廣告諷刺新Siri遙遙無期:仲等?不如換過部電話啦!
05 Aug 2025