先介紹呢座「香港摩天輪」，高60米，共42個車廂，其中一個係全透明VIP車廂，每艙最多容納8人，每程約15至20分鐘，轉動圈數介乎4至5圈，視乎人數多寡。車廂內亦設有冷、暖氣掣、燈掣、恆溫系統和WiFi網絡等。入夜後摩天輪更會亮燈，呈現紫藍色光，夾埋timing，仲可以喺高空欣賞埋幻彩詠香江。

嗱！即係咁，以上都係官方介紹，實際情況係點呢？真係玩過先知，MenClub戰地記者率先幫你哋玩咗一次，係咪好Nice呢？排隊買飛唔耐，2分鐘左右，票價$100（成人）、$70（12歲以下兒童、全職學生、傷殘人士或65歲以上人士），另外$500可以包晒成個車廂，喂！「包廂」想點先？你理得啲情侶吖~HEHE。

總括嚟講，香港摩天輪（Hong Kong Observation Wheel）幾好feel，但有幾點要留意︰

1. 試玩當日為星期二，未見擠湧，週末周日會否大排長龍仍是未知數。摩天輪每程轉三圈，需要點時間，加上好多空置車廂冇人坐，所以就算條隊唔太長，都咪以為好快就有得玩。

2. 摩天輪位處海傍，而近日天氣轉涼，排隊時頗為大風，男士們記得帶定禦寒衣物或暖包畀另一半、子女或長者。

3. 中環海旁現在有多個工程進行，難免出現地盤吊機襯靚景怪景，所以，唔好抱太高期望。

4. 娛樂設施欠奉，頭兩圈仲算新奇有趣，之後有少少悶場，建議在車廂播放音樂，成件事會開心好多。

5. 摩天輪由內至外，又由外至內，一直亮著泛著藍光！！想喺半空同Honey Selfie張見得人嘅相？近乎冇可能。

建議你喺手機裝定電筒APP，到你女伴要影相，立即可以幫佢打燈，令塊面由藍變白，影到張靚相，多人Like，你仲唔加爆分！

香港摩天輪（Hong Kong Observation Wheel）

開放時間：11am-11pm

價錢：$100（成人）、$70（殘疾人士、12歲以下兒童、全職學生及65歲或以上老人）、$1,500（3人以下VIP套票）、$2,500（4至5人VIP套票）

地址：中環海濱（近九號碼頭）

查詢：http://www.hkow.hk