所謂「串流遊戲」，即係話玩家用(快速嘅)網絡連線連接平台伺服器，由伺服器負責實際運算，玩家用自己嘅電腦、電視、電話又或者家用、手提機，接受畫面及操作就得嘅遊玩方法，好處係玩家唔需要再理遊戲平台或硬體需求，理論上只要有上網亦可以隨時隨地打機。

而對比其他串流遊戲平台，GeForce Now作為顯示卡大廠Nvidia的出品，當然會於畫面著手，只要訂購「FOUNDERS」版本就可以享用RTX顯示卡級別嘅影像效果，亦有「人多優先登入」、「登入時間延長至6小時」等待遇，每月只需4.99美金亦與其他平台睇齊。如果你只係想試下，更加可以免費遊玩，不過每次登入時間只有一小時，當然亦冇優先登入及RTX級影像。

而支援的遊戲方面，GeForce Now與Steam、Epic Games Store、Battle.net及Uplay等平台合作，容許玩家直接遊玩本身買咗嘅Game，對比其他串流遊戲需要玩家重新買Game仲要唔同Save，大大降低「轉會」門檻。但值得留意嘅係GeForce支援Windows、MacOS、Android電話，連Chromebook都即將支援，就係唔支援iPhone同iPad。

另外串流遊戲服務對硬體冇要求，但對個上網就好有要求，Nvidia指要享受最佳體驗，網速要達到50Mbps(一眾唐樓村屋玩家ByeBye)，而且網絡延遲亦要夠低。Nvidia於北美及歐洲自營嘅伺服器號稱延遲低於20ms，與日本東京Softbank、韓國首爾LG U+及俄羅斯莫斯科GFN.ru合作嘅伺服器更低於10ms。至於香港啦喎…暫時係未提供服務嘅。