雖然之前又退出街機業務又盛，但SEGA都係未執、下年仲迎黎60週年大日子添！而為咗慶祝，佢哋就會於出年1月舉行三場非常認真嘅「世嘉考試」、考試範圍包括世嘉60年來嘅街機、家用機作品、甚至世嘉公司嘅其他運作等，仲有「豐富獎品」，自問係世嘉迷嘅就要報定名參加啦。

圖片：截圖自SEGA

呢三場世嘉線上考試，將會於2021年1月23及24日舉行，三場嘅問題應該係完全一樣，但大家都可以重覆報名以確保自己有好成績 (淨係計最高分一場)。考試時間為60分鐘，考生們要答60條MC題，考完就會比個叫「SEGA IQ」嘅分數你。考之前仲有一系列「SEGA Semina」，由資深員工為大家講解世嘉發展史，如無意外就會包含哂考試會問嘅問題。

圖片：截圖自SEGA

咁你可能會諗，又限時又要上堂又盛，考完合格有咩獎呢？我只能夠講係充滿「驚喜」。只要你嘅SEGA IQ高過60分，你就會有個「SEGA 60TH MASTER」嘅稱號，同一個用黎裝飾嘅Icon；另外你仲會自動進入名額60名嘅抽獎環節，抽中就可以得到特別版Aime Card (SEGA街機嘅會員之類)及展示座，仲有一系列應該都冇咩人想要、而且淨係寄日本本土嘅週邊…即係簡單黎講，你做完個Test得到嘅係「愛」！