橫濱1:1高達將會於12月19日正式開幕，日前就安排咗日本傳媒率先參觀，亦係大眾第一次睇到整個會場嘅全貌。以下係引用《電擊Hobby》嘅報導，同大家分享下入面有咩睇啦。

1:1高達所在嘅場地其實係叫「Gundam Factory Yokohama」，而1:1高達就係「Gundam Factory Yokohama」嘅最大賣點。早前睇過日本網民拍攝嘅測試片段，大家都知部1:1高達唔單止大，仲係識著燈識郁。《電撃ホビー》就影低咗成個表演過程，大約3分鐘長，配合聲效及對白之後確係幾有臨場感。但部高達嘅移動速度都真係…唔快囉！

圖片：電擊Hobby

另外旅客亦可以於非表演時段，排隊搭Lift直上格納庫六樓，極近距離睇去睇部1:1高達。相信係熱門打卡點——到大家都有得去嘅時候可能要排好耐隊啦。

圖片：電擊Hobby

除此之外，場地仲有1:1高達嘅介紹區、一啲互動體驗區，後面仲有有嘢食有嘢買嘅「The Gundam Base Yokohama Satellite」。想睇更多圖呢，就去返《電撃ホビー》到睇啦。

資料來源：電撃ホビー