令人萬分期待嘅《Cyberpunk 2077》推出後就因為太多嚴重Bugs而被玩家剷到飛天，而原來同樣剷到佢哋飛天嘅仲有CD Projekt Red嘅內部員工。據《Bloomberg》報導，日前CD Projekt Red一個內部視象會議中紛紛向高層發炮，而高層就表示道歉及「會負上全責」。

據《Bloomberg》引述兩名有份參與會議嘅消息人士指，該會議發生於上星期四，亦即Sony宣佈會將《Cyberpunk 2077》下架之前一日。會議上其中一名員工問到，點解高層會於今年1月時對外宣稱隻Game已經「完成兼玩得」，但實際上當時隻Game根本就未完成，高層並無正面回答「點解」，只係話佢哋會負全責。另一名員工就質問高層「要求員工加班去開發一隻有關大企業剝削員工嘅遊戲，有冇覺得自己好虛偽」，而據《Bloomberg》指高層嘅回答就係「空泛而含糊」。

其實早於九月時，CD Projekt Red就已經違反承諾，強制要求員工每週工作六日，加班開發當時預定11月19日推出嘅遊戲，結果都係趕唔切，所以10月尾時宣佈延期到12月10日。最有趣嘅係10月尾宣佈嘅延期理由係「要顧及電腦、兩代PS、兩代Xbox等九個系統，確保所有嘢都Work都行得順」，依家睇返隻所有系統都唔順、唔Work嘅《Cyberpunk 2077》，分明就係代表唔夠時間修正問題——既然係咁又點解要趕住出呢？又難怪班員工咁嬲喎。